పట్టిసీమ పంపులు పీకేస్తానన్న జగన్.. ఇప్పుడు అవే నీళ్లు తాగుతున్నారు: దేవినేని ఉమా

స్థానిక సంస్థల ఎన్నికల్లో ఓటమి ఖాయమనే భయంతోనే వైసీపీ అధినేత జగన్ సరికొత్త డ్రామాలకు తెరలేపారని టీడీపీ సీనియర్ నేత, మాజీ మంత్రి దేవినేని ఉమా విమర్శించారు. ఈ ఎన్నికల్లో కూటమి అభ్యర్థులు 90 శాతానికి పైగా స్థానాలు గెలుచుకోవడం ఖాయమని ఆయన జోస్యం చెప్పారు. అమరావతిలో మీడియాతో మాట్లాడుతూ ఆయన ఈ వ్యాఖ్యలు చేశారు.

వైసీపీ నేతలే తమ నామినేషన్ పత్రాలను స్వయంగా చించుకుని, ఆ నెపాన్ని పోలీసులు, ప్రభుత్వంపై నెట్టే ప్రయత్నం చేస్తున్నారని దేవినేని ఉమా మండిపడ్డారు. "నామినేషన్లకు వెళ్తున్నారా? యుద్ధానికి వెళ్తున్నారా? పోలీసులపై దాడులు చేయడం ఏ సంస్కృతి?" అని ఆయన ప్రశ్నించారు. దర్శిలో మహిళా కానిస్టేబుల్, ఎస్సైల తలలు పగలగొట్టడం దుర్మార్గమని పేర్కొన్నారు. ఉమ్మడి కడప జిల్లాలోని 8 మున్సిపాలిటీల్లో వైసీపీనే విధ్వంసం సృష్టించి, ఆ నెపాన్ని ప్రభుత్వంపై వేస్తోందని ఆరోపించారు.

పులివెందులలో కిందిస్థాయి నేతలను నామినేషన్లు వేయమని జగన్ బతిమాలుకునే దుస్థితి ఏర్పడిందని ఎద్దేవా చేశారు. గతంలో పట్టిసీమ పంపులు పీకేస్తానని అన్న జగన్, ఇప్పుడు తాడేపల్లి ప్యాలెస్‌లో అవే నీళ్లు తాగుతున్నారని విమర్శించారు. చంద్రబాబు దూరదృష్టితో తెచ్చిన పట్టిసీమ, పురుషోత్తపట్నం ప్రాజెక్టులే రాయలసీమ, విశాఖ, కృష్ణా డెల్టాలను కాపాడుతున్నాయని స్పష్టం చేశారు. సుప్రీంకోర్టు ఆదేశాలపై కూడా వైసీపీ మీడియా వక్రభాష్యాలు చెబుతూ ప్రజలను తప్పుదోవ పట్టిస్తోందని ఆయన ఆగ్రహం వ్యక్తం చేశారు.